ദി പ്രീസ്റ്റ് ഒരുക്കിയ ജോഫിന്‍ ടി ചാക്കോ ആണ് സംവിധാനം
ആസിഫ് അലിയെ സംബന്ധിച്ച് മികച്ച വര്‍ഷമായിരുന്നു 2024. വലിയ ഹിറ്റുകള്‍ക്കൊപ്പം അദ്ദേഹത്തിന്‍റെ വേറിട്ട കഥാപാത്രങ്ങളും പ്രകടനങ്ങളുമൊക്കെ പ്രേക്ഷകശ്രദ്ധ നേടി. പുതുവര്‍ഷത്തിലും ആസിഫിനെ സംബന്ധിച്ച് കാര്യങ്ങള്‍ ശുഭകരമായിരിക്കുമെന്നാണ് ഏറ്റവും പുതിയ റിപ്പോര്‍ട്ട്. ആസിഫിന്‍റെ ഈ വര്‍ഷത്തെ ആദ്യ റിലീസ് രേഖാചിത്രം മികച്ച അഭിപ്രായമാണ് നേടുന്നത്. മലയാളത്തിന് അപരിചിതമായ ആള്‍ട്ടര്‍നേറ്റ് ഹിസ്റ്ററി എന്ന സബ്-ജോണറില്‍ എത്തിയിരിക്കുന്ന ചിത്രം വ്യാഴാഴ്ചയാണ് തിയറ്ററുകളില്‍ എത്തിയത്. റിലീസ് ദിനത്തില്‍ത്തന്നെ മികച്ച അഭിപ്രായം നേടുന്നതില്‍ വിജയിച്ച ചിത്രം തിയറ്ററുകളിലേക്ക് പ്രേക്ഷകരെ കാര്യമായി എത്തിക്കുകയാണ്.
പ്രമുഖ ട്രാക്കര്‍മാരായ സിനിട്രാക്കിന്‍റെ കണക്കനുസരിച്ച് ചിത്രം ആദ്യ ദിനം നേടിയത് 1.9 കോടി ആയിരുന്നു. ഇപ്പോഴിതാ രണ്ടാം ദിവസത്തെ കണക്കും അവര്‍ പുറത്തുവിട്ടിട്ടുണ്ട്. 2.35 കോടിയാണ് സിനിട്രാക്കിന്‍റെ കണക്കനുസരിച്ച് ആസിഫ് അലി ചിത്രം രണ്ടാം ദിനമായ വെള്ളിയാഴ്ച ചിത്രം നേടിയിരിക്കുന്നത്. ഇന്ത്യയില്‍ നിന്നുള്ള നെറ്റ് കളക്ഷനാണ് ഇത്. അതായത് ആദ്യ രണ്ട് ദിനം കൊണ്ട് ഇന്ത്യയില്‍ നിന്ന് മാത്രം ചിത്രം 4.25 കോടി നെറ്റ് കളക്ഷനാണ് ചിത്രം നേടിയിരിക്കുന്നത്. വിദേശ കളക്ഷനും കൂടി ചേര്‍ത്ത് വലിയ കണക്കുകളാണ് ചിത്രത്തെ കാത്തിരിക്കുന്നത്. മികച്ച അഭിപ്രായം നേടിയ ചിത്രമായതിനാല്‍ ശനി, ഞായര്‍ ദിനങ്ങളില്‍ ചിത്രം കാണാന്‍ കൂടുതല്‍ ആളെത്തുമെന്നത് ഉറപ്പാണ്. ഇത് കളക്ഷനെ മികച്ച രീതിയില്‍ സ്വാധീനിക്കും. അതേസമയം കളക്ഷന്‍ സംബന്ധിച്ച ഔദ്യോഗിക പ്രഖ്യാപനങ്ങളൊന്നും പുറത്തെത്തിയിട്ടില്ല.
ആസിഫ് അലി വീണ്ടും പൊലീസ് വേഷത്തില്‍ എത്തുന്ന ചിത്രത്തില്‍ നായികയായ കേന്ദ്ര കഥാപാത്രത്തെ അവതരിപ്പിച്ചിരിക്കുന്നത് അനശ്വര രാജന്‍ ആണ്. 1985 ല്‍ പുറത്തിറങ്ങിയ മമ്മൂട്ടി ചിത്രം കാതോട് കാതോരത്തിന്‍റെ ചിത്രീകരണഘട്ടത്തിന് രേഖാചിത്രത്തിന്‍റെ കഥാഗതിയില്‍ ഏറെ പ്രാധാന്യമുണ്ട്. മലയാള സിനിമയില്‍ ഇതുവരെ കണ്ടിട്ടില്ലാത്ത തരത്തിലുള്ള പ്ലോട്ട് ആണ് രേഖാചിത്രത്തിന്‍റേത്. ജോണ്‍ മന്ത്രിക്കലും രാമു സുനിലും ചേര്‍ന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. മനോജ് കെ ജയന്‍, സറിന്‍ ഷിഹാബ്, സിദ്ദിഖ്, ഭാമ അരുണ്‍, മേഘ തോമസ്, ജഗദീഷ്, നിഷാന്ത് സാഗര്‍, ഇന്ദ്രന്‍സ്, ഹരിശ്രീ അശോകന്‍, പ്രിയങ്ക, നന്ദു, ഉണ്ണി ലാലു, ഷഹീന്‍ സിദ്ദിഖ്, ടി ജി രവി, ശ്രീജിത്ത് രവി തുടങ്ങി വലിയ താരനിര അണിനിരന്ന ചിത്രം കൂടിയാണ് ഇത്.
ALSO READ : വന്യതയുടെ താളവുമായി ‘റൈഫിൾ ക്ലബ്ബി’ലെ ഗാനം; ലിറിക് വീഡിയോ എത്തി
ഏഷ്യാനെറ്റ് ന്യൂസ് ലൈവ് കാണാം
